Nationbranding duerch den Déiereschutz !?

vum Françoise Folmer a Christian Kmiotek

 Viru kuerzem huet d’Äntwert vum zoustännege Minister op eng Question Parlementaire vum gréngen Deputéierten Gérard Anzia erginn, datt zu Lëtzebuerg systematesch de Schwäin hir Schwänz amputéiert gin. Dat ass net nëmme konträr zu enger EU-Direktiv, mee och am Widdersproch zu engem nationale Règlement Grand-Ducal.

Et ass awer nëmmen ee Beispill vun enger ganzer Rei Methoden, déi an eiser Fleesch- a Mëllechproduktioun als onëmgänglech ugesi ginn. Dobäi weisen eis d’Biobetrieber, datt et och anëscht geet, an datt Schwäin durchaus kënnen ouni Schwanzamputatioun gehalen gin. Aner kurant Praktiken och hei zu Lëtzebuerg si systematësch Kastratioune vu Schwäin a Ranner, meeschtens ouni Anaesthesie an Nobehandlung, d’Ablatioun vun den Hare bei de Kéi, d’Schneide vun den Schniewele bei den Hénger, a villes méi. Skandaléis ass natiirlech och d’Shreddere vun de männleche Jippelcher, dat an Däitschland weiderhinn erlaabt ass, an zu Lëtzebuerg därzäit just dowéinst net existéiert, well d’Jippelcher net hei gezillt, mee importéiert gin.

Aus kommerzielle Grënn ignoréiert eis Gesellschaft systematesch déi onadäquat Haltungsmethoden an d’Leide vun den sougennanten „Notzdéieren“. Dat as fir eis Gréng net tolerabel. Mir fuerderen, datt eis zukünfteg Gesetzgebung unerkennt, datt en Déier net nëmmen en „être doué de sensibilité“ ass, mee och e sozialt Wiesen, dat Péng fillen a leide kann. Mir wëllen, datt eist neit Gesetz festhält, datt d‘Déiere komplex Intelligenzformen an och Gefiller hunn, déi et ze respektéiere gëlt. Mir brauchen en Ëmdenken an eiser Gesellschaft, a mir brauche méi Respekt, net nëmmen virun den Hausdéieren, mee och virun den „Notzdéieren“.

Et gëtt Alternativen an der Déierenhaltung, an d’Politik ass gefuerdert fir déi duerchzesetzen. Subventiounen un d’Bauere sollen un eng aartgerecht Déierenhaltung gebonne ginn, an de Konsument muss sensibiliséiert ginn, fir datt e Präisser fir Fleesch- a Mëllechprodukter akzeptéiert, déi et de Baueren erlaaben a besser Infrastrukturen an Haltungsmethoden fir hir Béischten ze investéieren.

Et ass kloër, datt dëst iwer Lëtzebuerg erausgeet, an datt hei op d’manst um europäeschen Niveau e Mentalitéitswiessel komme muss. Lëtzebuerg sollt sech awer net hannert deem Argument verstoppen, fir elo e neit Gesetz a Reglementer ofzeseenen, déi iwer Joëren all weidere Fortschrëtt an dëser Thematik blockéieren.

Jo, Lëtzebuerg soll d’Geleeënheet vun der neier Gesetzgebung, déi an der Präparatioun ass, notzen fir eng ganz Rei vu vermeidbare Quälereien bei „Notzdéieren“ ze verbidden, an domat Virreider an Europa ze sinn, wat eng ethesch korrekt Déierenhaltung ugeet.

Françoise Folmer a Christian Kmiotek

Veröffentlicht unter Allgemein, Ökologie, Europa, Gesellschaft, Tribune libre | Kommentar hinterlassen

Endlech e modernt Familierecht

 

vum Christian KMIOTEK a Françoise FOLMER

Christian KMIOTEK : Iwwer ee Joërzéngt hu verschidde Justizministeren dru gedoktert, elo leet de grénge Minister Felix Braz, no zwee an engem halwe Joër e komplett neit Familierecht vir. Wat ass dann dorunner esou modern?

Françoise FOLMER : Als éischt emol steet d’Kand am Mëttelpunkt an all Kand gëtt genee t’selwecht behandelt, egal wéi séng Elteren zuenee stinn: bestuet, gepacst, zesummen, auserneen oder gescheed. Domat gëtt eng laangjäreg Fuerderung vun eisem Verfaassungsgeriicht endlech ëmgesat.

An Zukunft hu béid Eltere gemeinsam d’Suergerecht an d’Opsiichtspflicht iwwer hiert Kand. Et gëtt nëmmen eng Ausnahm, nämlech wann d’„autorité parentale conjointe“ net am Intérêt vum Kand wier.

Dat neit Gesetz dréit och der Realitéit vun de Patchwork-Familie Rechnung: an Zukunft ass et méiglech, datt de neie Partner oder Partnerin vun engem Elterendeel verschidden deeglech Entscheedungen huelen därf fir dat Kand dat am selwechte Stot wunnt.

CK : Dat gemeinsamt Suergerecht vun den Elteren ass effektiv e grousse Fortschrëtt am Interessi vun alle Mamme, Pappen a Kanner, egal a wéi enger Konstellatioun se liewen. Mee domat net genuch: och d’Scheedungsprozedur gëtt entstëpst a vu Grond op nei ausgeriicht. Et gëtt an Zukunft nëmmen nach zwou Scheedungsformen: entweder wëll béid Partner dat esou wëllen (de „consentement mutuel“ wéi bis elo)oder awer well d‘Relatioun am Bestiednis definitiv gebrach ass (de sougenannten „Zerrüttungsprinzip“), aus watfirenge Grënn och ëmmer.

FF : Deemno verschwënnt den „divorce pour faute“, dee viru Geriicht oft zu héichemotionale Schlammschluechte gefuert huet an d’Prozeduren onheemlech an d’Längt zéie konnt. Och dat ass sécherlech am Interessi vun de Kanner a vun de betraffene Leit. D’Geriicht befaasst sech an Zukunft net méi mat de reellen oder imaginären Ursaachen firwat e Bestiednis an d’Bréch geet, mee consideréiert déi als eng Privatsaach. Just wann ee vun de Partner gewalttäteg géint eng Persoun am Stot wor, kritt eng Veruurteelung dofir Afloss op d’Konsequenze vun der Scheedung.

Haut ass et jo esou, datt wann ee sech net am Gudden eens gëtt, de Scheedungs-Parcours viru Geriicht enorm laang a komplizéiert ka sinn; ännert dat endlech?

CK: D’Scheedungsprozedure gi vereinfacht a méi séier. Et gëtt e „Juge aux affaires familiales“ geschaf, dee fir déi ganz Prozedur zoustaänneg ass, déi haut bei verschiddene Geriichter ka leien. Och t’Délaië gi verkierzt an et muss een net méi eng zweete Kéier virun de Riichter oder d‘Riichterin.

FF: Mat deem neie Familierecht geet d’Dräier-Koalitioun konsequent weider um Wee, eist Zesummeliewen ze moderniséieren, a mir gesinn dëse Projet an der Linn zum Beispill vum Bestiednis fir jiddereen, der Reform vun der Ofdreiwung an dem vereinfachten Zougang zur Lëtzebuerger Nationalitéit.

CK: Mir hoffen, datt och d’Oppositioun – a besonnech déi gréisst Oppositiounspartei – sech net dem Uleies vum grénge Justizminister verschléisst, endlech eist Familien- a Scheedungsrecht de Realitéite vun haut unzepassen.

Veröffentlicht unter Gesellschaft, Soziales, Tribune libre | 1 Kommentar

What is the state of the European Union?

At the Party Leader’s meeting held at the European Green Party Spring Council in Utrecht on May 21, 2016, I was asked to give a 3-minute appreciation on a possible breaking apart of the EU and of important topics at home. Here are the thoughts I shared with my colleagues.

What is the state of the (European) Union, several months before a possible BREXIT and an imaginable subsequent breaking apart of the whole? Which EU? The economic, the financial Europe is doing fine, advancing ever more on the road to liberalisation. But, what about the social dimension of the EU?

Its citizens see the EU as the Europe of multinationals and less and less as the one of the people. This of course gives food to all the right-wing populist parties, which on social issues awake the old nationalistic demons.

Luxembourg is a very typical example standing for Western European countries, whose people have achieved a certain level of welfare and social protection, good labour and health standards, okay consumer and environmental protection. These people, this electorate which is rather middle-class and aging – some may call it „good old Europe“ – are afraid to lose their rights and standards to globalisation. Populists surf on these fears. Which does not mean, that we Greens should not also address those legitimate worries, but in an appropriate manner, of course.

In the Western European countries, but much less in other territories, people’s worries about being possible losers of the ongoing globalisation and liberalisation, of having to give up acquired rights and standards to multinationals are projected on the TTIP negotiations and the already finalised CETA treaty.

Alongside the civil society actors, that do a great mobilising job, we Greens have a role to play. Jointly, we should not only heighten the awareness of the population on the threats on social, labour, health, food, environmental, legal, … standards and eventually on our democracy. We should also seek for further political allies. And I am especially looking towards our Social-Democratic friends, who should reflect their position on TTIP and CETA and analyse their electoral erosion in this light.

13221029_10209473688700164_3239983613889740458_n

Veröffentlicht unter Allgemein, Europa, Gesellschaft, Soziales, Wirtschaft & Finanzen | Kommentar hinterlassen

De grénge Plus

vum Françoise Folmer a Christian Kmiotek

Zanter 2 ½ Joër droën déi gréng elo Verantwortung um nationalen Niveau. Gréng Akzenter fënnt een iwerall an der Regierungspolitik wou et ëm sozial Gerechtegkeet an ëm Gläichstellung zwëschent Mann a Fra geht. Toleranz, Respekt viru Mënsch an Déier, an d’Suerg ëm d’Liewensqualitéit vu jidferengem Eenzele sinn aner Werter, déi sech wéi e grénge Fuedem durch d’Regierungsaarbecht zéien.

An de grénge Ressorten ass eis Regierungséquipe mat der Ënnerstëtzung vun den gréngen Deputéierten um beschte Wee, fir de Reformstau vun de leschten 20 Joër opzeléisen. Wichteg Projeten sinn elo endlech an der Ëmsetzung : de Chantier vum Tram mat Allem wat drun hänkt leeft op Héichtouren, Vëlosweeër gi gebaut, a Schinnestrecken a Gare gi moderniséiert. Nach nie virdrun sinn esou vill Suen an den öffentlechen Transport an a méi eng nohalteg Mobilitéit investéiert gin, fir endlech eis Verkéiersproblemer an de Grëff ze kréien. Domat net genuch : well den Auto och weiderhin en onverzichtbart Fortbewegungsmëttel hei zu Lëtzebuerg wäert sin, as et eis gréng wichteg, fir méi Sëcherheet op eisen Stroossen ze suergen. Dëst erreeche mer ënner aanerem durch d’Reform vum Punkteführerschäin, an duerch d‘Radaren, déi d’Leit zum Ëmdenken bei hirem Fuerverhale bréngen.

Well d’Gesondheet,d’Liewensqualitéit vun eiser Bevölkerung an de Waaserschutz ganz uewen op der grénger Agenda stinn, hu mer och endlech d’Ausweisung vun Quelleschutzzonen ugepak, an de Gebrauch vu Pestiziden ageschränkt. Well déi erneierbar Energien eis Zukunft sinn, klot Lëtzebuerg mat éisterräich zesummen um EU-Geriicht géint d’Subventionéierung vun der Atomenergie. Grad an dësen Zäiten ass d‘ Atomenergie duebel geféierlech, wou dach d’Atomzentralen besonnesch sensibel Ugrëffspunkte fir Terroriste kënnen duerstellen. Fir eis national Sëcherheet ze stärken a Gräueltaten wéi zu Paräis an zu Bréissel beschtméiglech entgéint ze wierken, huet dës Regierung mat hirem grénge Justizminister iwwregens séier no den Attentater vu Paräis mat engem konstruktive Moossnahmekatalog reagéiert, an dat ouni awer eise Rechtsstaat auszehiewelen.

Vill, ganz vill gréng Aarbecht ass um nationalen an euroäëschen Niveau zanter 2 ½ Joër geleescht ginn. All gréng Mandatären fréen sech drop fir an der 2. Halbzäit, grad ewéi an der éischter, déi gréng Energien ze bündelen: esou kënne mir zesummen am Interessi vun de Generatiounen déi no eis kommen eng méi nohalteg Zukunft opbauen.

Françoise Folmer a Christian Kmiotek

Veröffentlicht unter Ökologie, Energie, Europa, Gesellschaft, Mobilität, Tribune libre | Kommentar hinterlassen

Steiergerechtegkeet

Ech sinn der Meenung, datt déi blo-rout-gréng Steierreform sozial Gerechtegkeet, ekonomesch Stimulatioun an ëmweltpolitesch Impulser op eng clever Aart a Weis matenee verbënnt. Fir mech – deen an de Verhandlungen vun A bis Z derbäi war – stoungen d’ Gerechtegkeet an di sozial Mesuren am Zentrum vun den Iwwerleeungen.

D’ Steierreform hëlleft ganz cibléiert deene schwaachste Leit an eiser Gesellschaft a bekämpft den Aarmutsrisiko. D’ Steierklass 1A gouf zum Beispill esou ugepasst, datt se der reeller Situatioun vun de Fraen a Männer déi eleng hir Kanner erzéien a vun de Wittfraen a Wittmänner Rechnung dréit. De “Crédit d’impôt” fir d’Salariéën a fir déi Pensionéiert gëtt verduebelt, awer nëmme fir déi, di en och wierklech néideg hunn; wat d’Akommes méi héich, wat manner “Crédit d’impôt” bezuelt gëtt, bis en iergendwann ganz ewechfält.

Dëst ass en typescht Beispill vun zilgeriichter Steierpolitik: déi di et néideg hunn, kréien onkomplizéiert ënner d’ Äerm gegraff an déi di keng Cadeaue brauche, kréien och keng. Deemno war et och nëmme richteg, uewen an der Steiertabell nach zwou Tranche bäizesetzen: esou droen déi breet Schëllere méi wéi di schmuel.

Duerch déi intelligent Kombinatioun vum variabele “Crédit d’impôt” mat enger manner progressiver Steiertabell verschwënnt endlech de Mëttelstandsbockel, dee vu ville Leit als ongerecht ugesi gouf. Ech si frou doriwwer, datt vun 2017 un net nëmmen d’ Mëttelschicht méi am Portemonnaie huet, mee virun allem d’ Stéit mat nidderegem Akommes méi Kafkraaft kréien. Dat ass eng sozial gerecht Ëmverdeelung.

An déiselwecht Richtung ginn déi steierlech Moossname fir de Wunnengsbau ze stimuléieren. Ech begréissen et, datt besonnesch déi jonk Leit a Famillen et méi liicht gemaach kréien, fir zu hiren eegene véier Wänn ze kommen. Besonnesch gutt fannen ech och, datt iwwer cibléiert steierlech Mesuren an Zukunft méi Sozialwunnengen zur Verfügung stinn.

Selbstverständlech freeë mech och déi steierlech Moossnamen, fir den CO2-Ausstouss ze reduzéieren, eis Loftqualitéit ze verbesseren an eng nohalteg Mobilitéit no vir ze bréngen. Déi gréng an der Regierungsverantwortung hunn et fäerdeg bruecht, fir t’ éischte Kéier ëmweltpolitesch Mesuren an de Lëtzebuerger Steiersystem eran ze bréngen. Vun 2017 un gëtt et bei de Leasingsautoen e Bonus-Malus-System: wee méi verknascht, gëtt steierlech méi belaascht, ween ëmweltfrëndlech fiert, gëtt entlaascht. Domat kréie mer séier vill méi propper Autoen op d’ Strooss, well d’ Leasingsautoen oft gewiesselt ginn, mee dono laang als Occasioune gefuer ginn.

Och Privatleit ginn ënnerstëtzt: vun 2017 un ginn zum Beispill en Elektroauto mat 5.000 Euro an en E-Bike oder Pedelec mat 300 Euro steierlech subventionéiert. Och wa Verschiddener am Moment nach heiriwwer laachen; ech sinn iwwerzeegt, datt dës Méiglechkeete massiv wäerte genotzt ginn a mathëllefen, eis Mobilitéit ze veränneren.

Zu gudder Lescht: an Zukunft ginn endlech och d’ Benotzer vu Bunn a Bus belount; se kënnen hiert Joresabonnement vun de Steieren ofsetzen. Dat ass nëmme gerecht vis-à-vis vun deenen, déi mam Auto op d’Schaff fueren an dofir “frais de déplacement” ofsetzen.

Alles an allem eng richteg gutt Steierreform.

Veröffentlicht unter Ökologie, Mobilität, Soziales, Tribune libre, Wirtschaft & Finanzen | Kommentar hinterlassen

Konsequent fir d’Gesondheet vun de Leit

vum Christian KMIOTEK a Françoise FOLMER

Christian KMIOTEK: Virun zwou Wochen huet eng Majoritéit vun Europadeputéierten decidéiert, datt d’Ofgase vun den neien Autoën déi aktuell Grenzwerter bis 2020 därfen ëm méi wéi dat Duebelt iwwertreffen an dono därfe se weiderhin 50% driwwer leien.

Françoise FOLMER: Jo effektiv, dat as e Skandal! Amplaz sech fir d’Gesondheet vun de Biergerinnen a Bierger anzesetzen, huet d’Europaparlament majoritär d’Interesse vun der Autosindustrie ënnerstëtzt. Dës Decisioun ass e kloere Réckschrëtt a sie kéint bei de Leit en nach méi grouse Vertrauensverloscht vis-à-vis vun den europäeschen Institutiounen provozéieren.

CK: Déi gréng Europaparlamentarier hu behaapt, méi eng héich Stéckoxidbelaaschtung an eiser Otemloft géiw ganz vill Leit krank maachen?

FF: Dat stëmmt. Besonnech a ville Groussstied ass d’Loft net méi ze otmen; d‘Haaptursaach sinn d‘Dieselmotoren. An Europa stierwe ronn 400.000 Leit fréizäiteg u schlechter Loftqualitéit; et gëtt geschat, datt et zu Lëtzebuerg all Joër iwwer 300 Mënsche sinn, dat sinn der 10-mol méi wéi duerch Autosaccidenter ëm d’Liewe kommen.

CK: Well déi gréng sech konsequent fir d’Gesondheet vun de Leit asetzen, hunn all déi gréng Europadeputéiert géint d’Verschlechtere vun den Ofgasnorme vun den Autoë gestëmmt. Mee wat maachen déi gréng heiheem?

FF: Fir eis Haaptstad lieweswert z’erhale baue mer den Tram. Bei dësem Jorhonnertprojet geet et net nëmmen ëm eng wesentlech besser Mobilitéit. Et geet och drëm, manner Autoën an och manner Bussen am Stadzentrum ze hunn, fir esou d’Loftqualitéit massiv ze verbesseren – am Interessi vun der Gesondheet vun eis all.

CK: Déi gréng si jo awer net prinzipiell géint den Auto – well se benotzen e wann néidech och selwer, oder net?

20160112KmiotekFolmer2

FF: Genee! Den Auto gehéiert haut an och an Zukunft zu eiser Mobilitéit, genee esou wéi t‘Zefoussgoën, de Vëlo, de Bus, den Zuch an den Tram. Deemno ass et richteg a wichteg, datt eis Regierung och d’Infrastrukture fir Elekroautoën ausbaut, well mer eis esou ouni Loftverschmotzung a mat vill manner CO2-Ausstouss bewege kënnen.

Eng besser Loftqualitéit a méi a méi sëcher Velospisten encouragéieren dann och ëmmer méi Leit, fir bei kuerze Strecken op de Vëlo ëmzeklammen.

A propos Strecken: nexte Mount ginn d’Radaren op speziell geféierlëche Strecken a Betrieb geholl.

CK: D’Radare si ganz sëcher net do fir d’Leit ze kujenéieren, mee fir se um Liewen a bei gudder Gesondheet ze halen. Mir bekloën nämlech Joër fir Joër zevill Affer am Stroosseverkéier mat vill mënschlechem Leed duerch Doud oder Handicap.

FF: Mee och d’Stroosseninfrastrukture musse verbessert ginn.

CK: Absolut! An do sinn sech och gréng Ministeren net ze schued, fir déi Beem ewechhuelen ze loossen, déi scho bei normaler Vitesse eng Gefor niewt der Strooss sinn a bei denen keng aaner Schutzmoossnahmen fir d’Automobi-liste méiglech sin.

An da sin d‘Schoulkanner an hier Elteren sécher och déck zefridden domat, datt et an Zukunft méiglech gëtt, och op Staatsstrossen eng Tempo-30-Zon virun de Schoulgebaier anzeriichten.

FF: Konsequent fir d’Gesondheet vun de Leit an alle Beräicher. Och beim Fuussebandwuerm?

CK: Jo! Well et kee Sënn mécht, all Joër Dausende Fiiss ofzeknallen fir se dono an d’Dreckskëscht ze geheien, bleiwt d’Fuussejuegd nach e weidert Joër zou.

Mee well bei eis Gréngen d’Gesondheet vun de Mënsche virgeet, gin an deem Joër regelméisseg Fiiss ënnersicht, fir ze kucken op dee fir de Mënsch potenziell geféierleche Fuussbandwuerm sech ausbreet oder net. Déi gréng ginn hei net gefillsméisseg vir, mee loossen d’Situatioun wëssenschaftlech ënnersichen. An op alle Fall huet d’Gesondheet vun de Leit honnerprozenteg Prioritéit virun allen aneren Iwwerleeungen.

Veröffentlicht unter Allgemein, Ökologie, Europa, Mobilität, Tribune libre | Kommentar hinterlassen

Mënschenhandel – och zu Lëtzebuerg eng Realitéit

Laudatio den 2. Februar 2016 bei der Iwwerreechung vum Janusz-Korczak-Präis vun der Fondation Kannerschlass un d‘ „Maison de la Porte Ouverte“ an u „Femmes en Détresse“ a Präsenz vun der Chancegläichheetsministësch Lydia Mutsch an dem Justizminister Felix Braz

Léiw Eieregäscht, Léiw Frënn vun der Fondation Kannerschlass, léiw fréier Laureate vum Korczak-Präis,

Weess ech, wou mäin Hiem hierkënnt? Jo, ongeféier, vun irgendwou wäit aus dem Süden.

Weess ech, wou mäin Handy hierkënnt? Jo, op ongeféier, vun irgendwou wäit aus dem Osten.

Weess ech dann och, wee mäin Hiem gefierwt a gebutt huet, weess ech wee mäin Handy zesummegesat a verschrauwt huet? Do huet ee jo sou vaguement héieren, do géife Leit beschäftegt, déi ënner schlechte Conditiounen a mat minimalster Bezuelung eis bëlleg Saache produzéiere géifen. Do hofft een dann, datt net och nach Kanneraarbecht am Spill ass.

Wa mer éierlech sinn, da musse mer zouginn, datt mer déi Froë ganz séier op d’Säit drécken. An et kënnt eis guer net an de Kapp ze froën, op net och vläicht hei an do Sklavenaarbecht am Spill ass, déi dem Produzent eng Gewënnmaximéierung a jidderengem vun eis bëlleg Produiten erméiglecht.

Sklavenaarbecht? Jo! Mënschenhandel a Sklavenaarbecht ginn och eis am degleche Liewen eppes un.

Mënschenhandel ass da ginn, wann een e Mënsch rekrutéiert, transportéiert, transferéiert, ophëllt oder wunne léisst, andeems ee Gewalt oder Zwang, Bedruch oder Täuschung, mat oder ouni Geld gebraucht, fir dëse Mënsch auszenotzen. Dës Definitioun weist, datt all denkbar an ondenkbar Situatioune vun Onmënschlechkeet méiglech sinn.

Et gëtt geschat, datt weltwäit e puer Miliounen Affer vum Mënschenhandel der Zwangsaarbecht ënnerworf sinn. D’Donzelziffer ass enorm an et kann een dervun ausgoën, datt d’Beneficer an d’Dosënde Milliarde ginn. Kaum verwonnerlech, datt besonnech déi Schwaachst vun der moderner Sklaverei am meeschte betraff sinn: Meedercher a Fraën maachen 80% vun den Affer aus, bis zu 20% vun den Affer si mannerjähreg. De Nährbuedem vum rëffege Geschäft mat Mënschen ass d’Verletzlechkeet vu Persounen – egal watfieen Alter se hunn. Verschlëmmert gëtt d’Situatioun duerch Krich, Aarmut, sozial an ethesch Diskriminatioun an Exklusioun an duerch d’Absence vun ëffentlëcher Uerdnung.

No dëser Beschreiwung kéint ee jo mengen, de Phänomen vum Mënschenhandel géiw op kee Fall zu Lëtzebuerg optrieden. Abee wäit gefeelt! Et ass net well een ni eppes dervun héiert, well een eppes net gesäit, well een net hikuckt, datt et bei eis kee Mënschenhandel géiw.

Dir Dammen an Dir Hären,

Wësse mer, ween am Restaurant d’Geméis schielt an d’Geschir spullt? Sinn all déi Persounen ugemellt a kréien se hir ganz Pai ausbezuelt?

Wësse mer, ween op de grousse Schantecher d’Eise béit an d’Zillen dréit? Hunn all dës Leit geregelt Aarbechtszäiten, wou a wéi wunnen se? A wann se aus engem anere Land „ausgeléint“ sinn, wee kritt de Loun vun hirer Aarbecht?

Si mer eis bewosst, datt d’Geschicht vun der Prostituéiert, déi hir „Aarbecht“ aus eegener Iwwerzeegung mécht, zu quasi 100% e Mythos ass?

12654167_10208742001651892_8973012848668521633_n

Léiw Mataarbechterinnen a Mataarbechter vu „Femmes en Détresse“ a vun der „Maison de la Porte Ouverte“,

Dir sidd ganz besonnech prédestinéiert als Laureate vum Korczak-Präis, an dat aus zwee gudde Grënn.

Dëse Präis dréit den Numm vum polnëschen Dokter a Pädagog Janusz Korczak, deen als éischten d’Kannerrechter ervirgestrach huet, well en Ufanks vum 20. Joërhonnert gesinn huet, watfir e Misär besonnech déi ouni Rechter z’erdroën hunn. Well hien e Judd war, gouw hie mat de Kanner aus séngem Weesenhaus vun den Naziën an e KZ deportéiert. Do war d‘ Zwangsaarbecht industriell duerchorganiséiert an drop ausgeriicht, nach dat Lescht aus de Mënschen erauszepressen an se dann ze vernichten.

Deen zweete Grond läit am Wiese selwer vum Korczak-Präis, deen d‘Fondation Kannerschlass all zwee Joër vergëtt. Dee Grupp vu Fraën a Männer, déi de Laureat eraussichen, weess aus laange Joren Erfahrung, datt déi puer Sou déi mer ginn, just ganz e bëssen derzou bäidroën, den ausgewielte Projet ze stäipen. Wat de Korczak-Präis wierklech ausmécht, dat ass de Medienecho, d’Öffentlechkeet déi duerch de Präis geschafe gëtt, d’Liicht dat op d‘Problematik geworf gëtt.

Elo ka kee Mënsch méi behaapten, Lëtzebuerg wär eng idyllesch Insel ouni grave Mënscherechtsverletzungen. Elo muss d’Öffentlechkeet sech bewosst ginn, dass et och bei eis Mënschenhandel a modern Sklaverei gëtt. Mir mussen all déi néideg Instrumenter asetzen, fir de Mënschenhandel ze detectéieren an d’Affer z’identifizéieren. D’Hannermänner vum Mënschenhandel, déi soss näischt si wéi schwéier Krimineller, mussen d’Handwierk geluecht kréien. An d‘Affer brauchen eis Hëllef an Ënnerstëtzung.

D‘ „Maison de la Porte Ouverte“ a „Femmes en Détresse“ hu schonn ugefaang mat der Aarbecht, am Ament nach mat ganz bescheidene Moyenën.

Léiw Laureaten,

haut den Owend éiere mer Iech a mir soën Iech Merci fir déi gudd Aarbecht déi Dir bis elo am Donkele geleescht hutt. Doduerch datt mer Är Effortën fir puer Momenter ënnert de Scheinwerfer vun der Öffentlechkeet weisen, si mir all an ass och d‘Politik opgeruff, nach méi Ustrengungen ze maachen, fir déi Männer, Fraën a Kanner déi Affer vum Mënschenhandel sinn, vun hire Fesselen ze befreien.

* * *

http://www.gouvernement.lu/5674504/03-mutsch-prix

Veröffentlicht unter Allgemein, Gesellschaft, Soziales | Kommentar hinterlassen